دفتر احوال الحياة

عمارتنا..

السكان طالعين نازلين..كل واحد سرحان في دنيته ،يبتسمون احيانا اذا تقابلوا علي السلم ،واحيانا غارقين في مشكلة حصلت او امنية خايفين ماتحصلش...

شقق مقفولة اصحابها مسافرين ،او ربنا فتح عليهم وعزلوا في مكان اشيك انما محتفظين بالشقه ام خمسه جنيه (ارخص من علبة السجاير) من باب الطمع

واهي تجيبلنا قرشين احسن من عين اصحابها ..........

شقه بترقع زغاريد وتعلي الكاسيت علي (مبروك عليك يامعجباني)......البنات تجري ناحيه الشباك والفضول يطل من عيونهن..مين اللي نفدت من عفريت العنوسه..

اللي اصبحت ازمة حقيقية بين الشباب ..وشقه تانية بترقع بالصوت من خناقة معتبرة بين اللي كرمها ربنا بالزواج وبين المعجباني الغالي اللي هو جوزها..

والعربيات قفلت الشارع تماما..ناس جايه تحضر كتب الكتاب..وناس جايه تخدم في الخناقة واحنا بنتنا مش وش بهدلة..وفشر..هو انتوا كنتوا تحلموا بادهم..

ولما الاسعاف خدت ادهم..والشرطه اخدت عيلة مراته........كان الكاسيت لسه بيعمل غسيل مخ للناس (واحنا الليلةدي كدنا الاعادي.....) ودولاهمه مش حاسيين

بدوكهمه...........كل واحد يغني علي ليلاه..

قابلت عم حسين البواب عينيه كلها حزن واسي ،تعجبت جدا لان يوم زي ده بيبقي موسم لعم حسين ، في الافراح مبروك ..وربنا يتمم بخير..قابض بقشيش...

وضامن عشوه وحلويات.........وفي الخناقه ..سادد في فتح الاسانسير مخصوص عشان جنابك ..ووالله بنتكم اميره وفي حالها،بس بختها شويه ،ومايمنعش

كلمتين في ودن ام ادهم..ده كل سكان العماره بيحلفوا باخلاق البيه،انما حانقول ايه في طبع بنات اليومين دول..وتنهيدة زهد وهو بيضرب المبلغ في السياله.

مالك ياعم حسين.......قال يومين واخدهم كعب داير بين المستشفيات والشرطة بادور علي جريبي ..نزل مصر م البلد يعمل فيزا عشان يسافر يشتغل في الخليج

لاحس ولاخبر..وفين لما لاجيناه في ثلاجه الجصر العيني ياولداه......شياطين الشك اتحركت في راسي..بس..!!لازم وقع في حد من سماسره بيع الاعضاء البشريه

سألته -شفته كويس ياعم حسين ؟............شفته كويس كيف يعني..باجولك مات..- يعني فتشت جسمه.؟ -.افتش ايه يا نضري هو لو كان حيلته حاجه كان يروح

يتغرب برضك ؟ تفتكروا سكت ولميت الموضوع ورحمت حالته؟؟ابدا هيتشكوك اشتغل جامد في نافوخي وانبريت بكل شهامه احكيله عن تجاره الاعضاء ..وسرقة

كلاوي الناس الغلابة اللي بتيجي مصر تطلع فيز..علي فكره انا ماكدبتش بس الحادثة دي متكررة فعلا وضحاياها عادة زي قريب عم حسين.................

المهم ان عم حسين سخن اوي وكبرت في دماغه يسرقوا كلية قريبه..وصحي بعض السكان اصحاب النفوذ وراح الثلاجه تاني يعاين قريبه ويطمئن علي الكليه

وبالمره شقر علي الكبد ...وقاللي ده لو طلع ناجص شعرايه حيبجي الدم للركب...

كان كفايه ابص في عنيه عشان اعرف الرد..الحقيقه هو ماكانش طايقني لان قريبه الحمد لله مات في حادثه..ضربته سياره..والحمدلله ان السواج هرب والا كان

بجي الدم للركب.....بصراحة ماكانش فيه داعي للي انا قلته لعم حسين ..لكن انا عندي اعراض مش عاجباني بدات تضايقني واهي كمان بتضايق الناس كمان

وربنا يستر..اصلي عقبال القارئين نويت ماكونش سلبيه...مش ناويه اطنش او اشوف واغمض زي ما كنت دايما باعمل كده ...وده السبب اننا كلنا بقينا كده.

بعدين هاحكيلكم كل حاجه...المهم ان كل الاحداث دي حصلت في يوم واحد ..سجلتهالكم من دفتر احوال العمارة...................